السلام عليكم ورحمه الله وبركاته
إزيكم يا أحلى فتوكات بصوا بقى أنا ما كنتش بحب أكله السبانخ ديه خالص وكانت لما أمي بتعملها كان بيبقى يوم عصيييييييييب في البيت عندنا ولازم يعيني تعمل صنف تاني علشان المحروسة اللي هو أنا أكل
بس بعد لما اتخطبت وعقدت ورحت اتعزمت عند حماتي وكانت عاملة سبانخ قلت بس لازم أكل يعني أكل ما فيش مفر مش معقولة بقى هقول عايزة صنف آخر بس قلت هنقفل الأوضة بترباس وهتأكل يا عباس ههههههههههه
المهم قعدنا وكلنا وبصراحة كلت ولقيته طعمه تحفة جدددددددددا اللهم بااااااااارك فطبعا علشان أداري إني ما مش بحبه لأنه طلع زوجي بيموت فيه قولتلها أمي ده أمي بتعمل السبانخ بطريقة وأنتي بطريقة قالتلي أه بس جوزك مش بيحبه إلا بالطريقة ديه قلتلها خلاص يوم ما تعمليه هجيلك وأشوف الطريقة وفعلا ده اللي حصل ومن يوميها وأنا بعمله وزوجي بيموت فيه رغيت كتير معلش تعالوا أقولكم عملت إيه
أولا حاجة جبت حزمتين متوسطين سبانخ ونصف حزمة كسبرة خضرا لو كانت الحزمة كبيرة تبقى نصفها لو كانت صغيرة ورفيعة كدا تبقى الحزمة كلها
ثانيا بصلة متوسطة
ثالثا طماطميتين و3 ملاعق صلصة
رابعا ملعة كبيرة مليانة رز مصري
خامسا توم
سادسا كام طرطوفه كدا من حزمة الكسبرا من تحت
الطريقة بقى:
أولا حاجة نغسل السبانخ والكسبرا كويس جدا ونحطهم في مصفاه يتصفوا
تاني حاجة نقطعهم رفيع علشان أنا زوجي مش بيحب العيدان تكون باينة وفي نفس الوقت بيكون طعمهم أحلى
وده شكل السبانخ والكسبرا بعد ما قطعتهم وقلبتهم مع بعض
وبعدين جبت البصلة قطعتها رفيع وصفرتها في شوية سمنة وبعدين حطيت عليها الطماطم المعصورة في الخلاط والصلصة
وأول لما الصلصة غليت وبدأت تتسبك حطيت الملح والفلفل الأسود وبعد كدا سقطت السبانخ والكسبرا مع بعض وقلبت تقليبة
وتوطي النار ونغطي الحلة بعد كدا نجيب ملعقة الرز ونغسلها كويس ونحمرها في شوية زيت صغيرين زي الشعرية بالظبط والدتي بتعملها بالحمص
وأول ما يتحمر الزر أصفيه من الزيت وأحطهم في حلة السبانخ وأقلب تقليبه وأغطي تاني
نيجي بقى لسر النكهة
هنجيب طرطوفة الكسبرة زي ما قولتلكم وهنقطعهم كويس قوي كأنك بتخرطي ملوخية مع 3 فصوص توم مفرومين ناعم جدا ونحطهم مع حته زبدة ونحمرهم زي بالظبط طشة الملوخية بس من غير شهقة ههههههههههههههههههههه
ونطشهم على السبانخ وشمي بقى الريحة واااااااااااااااااو
نقلب تقلبتين كدا ونطفي عليه
وده أول طبق لأول فتوكة مع رز بالشعرية ولحمة محمرة ( بصوا أنا سلقت اللحمة في شوية ماء وبصلة مقطعة أربع تربع وفصين توم وفلفل أسود وشوية قرفة وشوية حبهان مطحون ورق لوري ولما غليت شيلت الريم ووطيت عليها ولما بدأت تستوي حطيت الملح والله من حلوتها أنا كلتها مسلوق أنا حمرت دولت لزوجي لأنه بيحب اللحمة متحمرة ) وزيتون وفلفل حامي وحمه زوجي
ها إيه رأيكم ما تنسوش التقيم ودعوة بالظهر الغيب أن ربنا يبارك في أولادي ويجعلهم من حفظه كتاب الله ويرزقني ختم القرآن السنادي بإذن الله
أستودعكم الله
والسلام عليكم ورحمه الله وبركاته
المصدر: موقع " فتكات "
0 التعليقات:
إرسال تعليق